1. Kumbhaṅgapañha
“Bhante nāgasena, ‘kumbhassa ekaṁ aṅgaṁ gahetabban’ti yaṁ vadesi, katamaṁ taṁ ekaṁ aṅgaṁ gahetabban”ti?
“Yathā, mahārāja, kumbho sampuṇṇo na saṇati;
evameva kho, mahārāja, yoginā yogāvacarena āgame adhigame pariyattiyaṁ sāmaññe pāramiṁ patvā na saṇitabbaṁ, na tena māno karaṇīyo, na dabbo dassetabbo, nihatamānena nihatadabbena bhavitabbaṁ, ujukena amukharena avikatthinā.
dabbo → dappo (bj, maku, pts-vp-pli1) | nihatadabbena → nihatadappena (pts) | dabbo → dappo (cck: sī.)
Idaṁ, mahārāja, kumbhassa ekaṁ aṅgaṁ gahetabbaṁ.
Bhāsitampetaṁ, mahārāja, bhagavatā devātidevena suttanipāte—
‘Yadūnakaṁ taṁ saṇati, yaṁ pūraṁ santameva taṁ; Aḍḍhakumbhūpamo bālo, rahado pūrova paṇḍito’”ti.
Aḍḍhakumbhūpamo → rittakumbhūpamo (bj, pts-vp-pli1) | aḍḍhakumbhūpamo → rittakumbhūpamo (pts) | Aḍḍhakumbhūpamo → rittakumbhūpamo (cck: sī.) pūrova paṇḍitoti kumbhaṅgapañho paṭhamo → pūro va paṇḍito ti (pts)