5. Agadaṅgapañha
“Bhante nāgasena, ‘agadassa dve aṅgāni gahetabbānī’ti yaṁ vadesi, katamāni tāni dve aṅgāni gahetabbānī”ti. “Yathā, mahārāja, agade kimī na saṇṭhahanti; evameva kho, mahārāja, yoginā yogāvacarena mānase kilesā na saṇṭhapetabbā. Idaṁ, mahārāja, agadassa paṭhamaṁ aṅgaṁ gahetabbaṁ.
Puna caparaṁ, mahārāja, agado daṭṭhaphuṭṭhadiṭṭhaasitapītakhāyitasāyitaṁ sabbaṁ visaṁ paṭihanati;
paṭihanati → paṭihanti (pts)
evameva kho, mahārāja, yoginā yogāvacarena rāgadosamohamānadiṭṭhivisaṁ sabbaṁ paṭihanitabbaṁ.
Idaṁ, mahārāja, agadassa dutiyaṁ aṅgaṁ gahetabbaṁ.
Bhāsitampetaṁ, mahārāja, bhagavatā devātidevena—
‘Saṅkhārānaṁ sabhāvatthaṁ, daṭṭhukāmena yoginā; Agadeneva hotabbaṁ, kilesavisanāsane’”ti.
kilesavisanāsaneti agadaṅgapañho pañcamo → kilesavisanāsane ti (pts)