Find the Truth

In the Pāli Suttas and Vinaya

settings

{{table.suttaCol}} {{table.readCol}} {{table.titleCol}} {{table.wordsCol}} {{table.countCol}} {{table.mrCol}} {{table.linksCol}} {{table.typeCol}} {{table.quoteCol}}
{{table.wordCol}} {{table.textsCol}} {{table.matchesCol}} {{table.linksCol}}

{{results.variantsForLabel}}

Variants 1/2 columns Dictionary Multi-select Compass Help

Note:Translations, dictionaries and commentaries were not made by the Blessed One.Cross-check with Pali in 4 main nikayas.

  • Milindapañha
  • Opammakathāpañha
  • Gadrabhavagga

2. Kukkuṭaṅgapañha

“Bhante nāgasena, ‘kukkuṭassa pañca aṅgāni gahetabbānī’ti yaṁ vadesi, katamāni tāni pañca aṅgāni gahetabbānī”ti? “Yathā, mahārāja, kukkuṭo kālena samayena paṭisallīyati;
paṭisallīyati → patisallīyati (pts)
evameva kho, mahārāja, yoginā yogāvacarena kālena samayeneva cetiyaṅgaṇaṁ sammajjitvā pānīyaṁ paribhojanīyaṁ upaṭṭhapetvā sarīraṁ paṭijaggitvā nahāyitvā cetiyaṁ vanditvā vuḍḍhānaṁ bhikkhūnaṁ dassanāya gantvā kālena samayena suññāgāraṁ pavisitabbaṁ.
vuḍḍhānaṁ → buḍḍhānaṁ (pts)
Idaṁ, mahārāja, kukkuṭassa paṭhamaṁ aṅgaṁ gahetabbaṁ.

Puna caparaṁ, mahārāja, kukkuṭo kālena samayeneva vuṭṭhāti; evameva kho, mahārāja, yoginā yogāvacarena kālena samayeneva vuṭṭhahitvā cetiyaṅgaṇaṁ sammajjitvā pānīyaṁ paribhojanīyaṁ upaṭṭhapetvā sarīraṁ paṭijaggitvā cetiyaṁ vanditvā punadeva suññāgāraṁ pavisitabbaṁ. Idaṁ, mahārāja, kukkuṭassa dutiyaṁ aṅgaṁ gahetabbaṁ.

Puna caparaṁ, mahārāja, kukkuṭo pathaviṁ khaṇitvā khaṇitvā ajjhohāraṁ ajjhoharati;
pathaviṁ → paṭhaviṁ (pts)
evameva kho, mahārāja, yoginā yogāvacarena paccavekkhitvā paccavekkhitvā ajjhohāraṁ ajjhoharitabbaṁ ‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṁsūparatiyā brahmacariyānuggahāya, iti purāṇañca vedanaṁ paṭihaṅkhāmi navañca vedanaṁ na uppādessāmi, yātrā ca me bhavissati anavajjatā ca phāsuvihāro cā’ti. Idaṁ, mahārāja, kukkuṭassa tatiyaṁ aṅgaṁ gahetabbaṁ. Bhāsitampetaṁ, mahārāja, bhagavatā devātidevena—

‘Kantāre puttamaṁsaṁva, akkhassabbhañjanaṁ yathā; Evaṁ āhari āhāraṁ, yāpanatthamamucchito’ti.
yāpanatthamamucchitoti → yāpanatthāy amucchito ti (pts)

Puna caparaṁ, mahārāja, kukkuṭo sacakkhukopi rattiṁ andho hoti; evameva kho, mahārāja, yoginā yogāvacarena anandheneva andhena viya bhavitabbaṁ, araññepi gocaragāme piṇḍāya carantenapi rajanīyesu rūpasaddagandharasaphoṭṭhabbadhammesu andhena badhirena mūgena viya bhavitabbaṁ, na nimittaṁ gahetabbaṁ, nānubyañjanaṁ gahetabbaṁ. Idaṁ, mahārāja, kukkuṭassa catutthaṁ aṅgaṁ gahetabbaṁ. Bhāsitampetaṁ, mahārāja, therena mahākaccāyanena—

‘Cakkhumāssa yathā andho, sotavā badhiro yathā;
cakkhumāssa → cakkhum assa (pts)
Paññavāssa yathā mūgo, balavā dubbaloriva;
Paññavāssa → jivhavāssa (bj); jivhāmassa (maku); jivhāvassa (pts-vp-pli1) | paññavāssa → jivhāv assa (pts) | Paññavāssa → jivhāvassa (cck: sī. pī.)
Attaatthe samuppanne, sayetha matasāyikan’ti.
Attaatthe → atha atthe (bj, maku, pts-vp-pli1 19Th1.501/1) | attaatthe → atha atthe (pts) | Attaatthe → atha atthe (cck: sī. pī.)

Puna caparaṁ, mahārāja, kukkuṭo leḍḍudaṇḍalaguḷamuggarehi paripātiyantopi sakaṁ gehaṁ na vijahati;
leḍḍudaṇḍalaguḷamuggarehi paripātiyantopi → leḍḍudaṇḍalakuṭamuggarehi paripātiyanto pi (pts)
evameva kho, mahārāja, yoginā yogāvacarena cīvarakammaṁ karontenapi navakammaṁ karontenapi vattappaṭivattaṁ karontenapi uddisantenapi uddisāpentenapi yoniso manasikāro na vijahitabbo, sakaṁ kho panetaṁ, mahārāja, yogino gehaṁ, yadidaṁ yoniso manasikāro. Idaṁ, mahārāja, kukkuṭassa pañcamaṁ aṅgaṁ gahetabbaṁ. Bhāsitampetaṁ, mahārāja, bhagavatā devātidevena ‘ko ca, bhikkhave, bhikkhuno gocaro sako pettiko visayo? Yadidaṁ cattāro satipaṭṭhānā’ti. Bhāsitampetaṁ, mahārāja, therena sāriputtena dhammasenāpatināpi—

‘Yathā sudanto mātaṅgo, sakaṁ soṇḍaṁ na maddati;
sudanto mātaṅgo → sumanto mātango (pts)
Bhakkhābhakkhaṁ vijānāti, attano vuttikappanaṁ.

Tatheva buddhaputtena, appamattena vā pana; Jinavacanaṁ na madditabbaṁ, manasikāravaruttaman’”ti.
manasikāravaruttamanti kukkuṭaṅgapañho dutiyo → manasikāravarutta manti (pts)

Kukkuṭaṅgapañho dutiyo.

Principles · Rationale · Glossary · 6 Pali editions